毛記電視「勁曲金曲」對友台的關注，實在非常體貼入微，不信？請看看不久前榜上有名的《藍晶拍劇未曾港》：「你這剎那在南方，我拍嘅劇未曾港，從來唔聯繫上，也會有C9觀看。」哈哈，智者一聽就知這些毛孩妒忌人家收視率節節上升，唔抵得慧眼識英雄的家庭主婦一窩蜂捧場，眼火爆之餘故意造謠抹黑。新潮婦女合唱團的《再．回家》聲討膠劇死唔斷氣，意圖更加坦白：「在晚間，TVB會播一種戲，從佛誕到過年也不更改；任我等，終於等到長劇釘蓋，無奈佢，這套劇可一可再。」出爾反爾最近十分流行哩，君不見宮崎駿揚言退休揚了多少次嗎，復出頻密過家常便飯，簡直令「姣婆守唔到寡」這種具性別歧視色彩的民間智慧從此失去存在意義，相比之下，連續劇大結局之後立即添食算得了什麼，只要粉絲依時依候伏在電影機前如痴如醉，你理得佢食老本食到地老天荒！
可能基於鋤強扶弱心態吧，另一電視台獲得百分百溫柔對待，搣吓搣吓細水長流，以極品儒主唱的《亞視永恆》每周贈佢一句。開頭總是正氣浩然的「亞視會，永遠都存在」，跟着一一忠實描繪該台面貌，包括「有朱慧珊，仲有個何B」、「有宮雪花，仲會掟壽包」、「會選亞姐，仲會播殘片」及「有跑馬睇，仲有個魚缸」等，期期新款樣樣唔開胃，笑到下巴甩骹。另一首連續歌是港姐倫以唔鹹唔淡粵語夾雜不純正普通話唱出的《說好的美貌呢》，內容如「情緒莫名的多謝，我嫌你騎呢，而妳斷斷續續被人噓，究竟咩事呢」固然夭心夭肺，更煞食的肯定是形式，單聞其聲佳麗們如在目前。