東亞足球錦標賽噚日就率先上演女足比賽，東道主中國就出師不利，主場以0:1不敵南韓；朝鮮民族就威到盡，北韓早場就以4:2大炒世界盃亞軍日本。
中國世界盃八強光榮出局，唔少人都以為可以重建「鏗鏘玫瑰」本色，加上武漢主辦比賽，中國有主場之利，所以賽前都備受追捧。不過遇上壓力下，估唔到同男足一樣恐「韓」，全場組織力麻麻，埋門機會亦唔多，相反南韓前鋒鄭楔檳27分鐘禁區頂勁射入網，中國美女門將王飛身高手長都救唔到，南韓就憑呢個入球，以1:0擊敗中國，全取三分。
北韓4:2大炒日本
同日頭場比賽，世界盃亞軍日本就認真失威，面對北韓就全場處於下風，北韓早段有金恩珠射失12碼，大家都擔心佢使唔使被犬決，好彩隊友李藝京同羅恩心雙雙梅開二度，以4:2大勝兩度追平嘅日本，衞冕之旅打咗枝強心針。中國下一場就要硬拼北韓，如果再失分，拎冠軍嘅機會就真係渺茫。