謊茂哥篤棟倒地，全城站起來，一齊去片，慢鏡重溫，現場有人大嗌：「插水！去踢曼聯啦！」旁白精警，秒殺專業足球評述員，這一句，順利候選2015年至fit金句。
垂直式插水滾下，一秒之內，緊抱自己右膝倒地，一動不動，但兩眼必須半開。這個插水鋪屎，勢必成為紀律部隊考核的新評本，指定取代引體上升，一插一滾，絕無欺場。如果國家跳水隊不介意，可以抽謊茂鋪屎水，因侮辱而成名，謊茂哥，你終於得咗，威過首副，使乜鬼等！
垂直抱膝插水，一氣呵成，完美示範了高等學府校委的骨質水平。可是，犯咗法又點喎，點解要報警？謊茂哥，你等埋校長未？唔驚傳媒勾線嗎？噢，你報警時，有冇忍唔住抄襲對白：「有嘢從走廊跌了下來。」咳咳，不是指你個膝頭，而是港大個排名龍頭。龍頭插水，腦漿塗地，而校委還眉飛色舞繪影繪聲說：「學生虐待老人啊，好彩校委死唔眼閉，仲行得，拿輪椅來推佢啦！」嗨，重案組，幾時案件重組，記得搵埋××小學校長。