香港球迷等到頸都長，終於等到「小丁」丁俊暉訪港喇！呢位中國一哥相隔八年，今日將會現身銅鑼灣嘅南華體育會，同吳安儀合演慈善桌球賽。
繼世界一哥沙比同埋新科世界冠軍冰咸喺六月底訪港，世界排名第三嘅小丁今日都殺到香港參加慈善賽。自從2007年來港參戰歐亞盃，小丁一直都冇喺香港公開亮相，噚晚佢就喺內地飛抵香港，準備今日晏晝兩點喺南華會出席開球禮，緊接兩點半就會同港產女子世界冠軍吳安儀，合演五局三勝制嘅性別大戰。比賽屬慈善性質，主辦方會選取兩位球手雙加度數最高嘅三局，以每度1,000港元計算，將善款撥捐去四個本地慈善團體。
之前同冰咸對戰，兩個月後又鬥小丁，有晒經驗嘅安儀唔算緊張，一早講明為慈善而戰，目標係爭取更多善款，但為咗隆重其事，呢位「四眼妹」禮拜二都專登走去名牌眼鏡店，講笑話配咗副新眼鏡做武器。不過，主辦方就話因為場地座位有限，活動唔開放畀其他球迷參與，想睇呢場另類大戰嘅球迷恐怕未能如願喇！