原本諗住喺今屆游泳世錦賽攬晒13面跳水金牌嘅中國「夢之隊」，揩完一鑊又一鑊。繼喺女子一米板同埋男女子混雙失金之後，禮拜四又喺女子10米台揩嘢（見附表），仲要輸畀隨時連泳池都唔多個嘅北韓，俾對方嘅16歲高中生金雲香擸走面金牌。金雲香喺頒獎台聽到國歌時仲爆喊，梗係啦，佢咁叻幫北韓創造歷史，返國之後唔單止唔使俾人捉去揼石仔，仲隨時大富大貴㖭。
即刻多謝金正恩
所謂衰開有條路，夢之隊禮拜四雖然派出司雅杰同埋任茜出戰女子10米台，但始終贏唔到呢面金牌返嚟；司雅杰三甲不入，任茜就只係得銀牌，以9.05分之差輸咗畀總分係397.05分嘅北韓16歲選手、首次玩世錦賽嘅金雲香。喺頒獎台上喊到收唔到聲嘅金雲香政治好正確，即刻多謝國家領導人金正恩：「係我嘅國家同埋人民俾力量我，呢次係北韓第一次揚威世錦賽，亦係渴望已久嘅偉大勝利。國歌奏響嗰陣，我喊咗出嚟，因為我為祖國人民帶嚟喜訊。」
又瘦又細粒嘅金雲香繼續話：「我12歲開始練習跳水，每日練五個鐘，朝早兩個鐘同晏晝三個鐘。每日嘅訓練都要盡量唔同，要跳五個動作，大約要跳40次。我偶像係陳若琳，可惜佢今次冇玩，希望將來有機會同佢較量。」
被問到返國後知唔知有乜獎勵時，佢好風趣咁話：「我諗當我返到去之後，全國人民會喺街上幫我慶祝勝利啩。」北韓之前踢南非世盃分組賽三場輸晒包尾出局，據聞班球員返國後被批鬥，兼俾人罰去礦場揼石仔；家陣金雲香咁醒幫北韓爭光，梗係唔使揼石仔，仲分分鐘重重有賞㖭。
夢之隊已失三金
至於幫唔到「夢之隊」攞金牌嘅任茜就面如死灰：「我唔係好滿意自己嘅表現，喺第二跳同第三跳都有失誤，但都唔係冇得着，起碼累積到大賽經驗。」今屆游泳世錦賽嘅跳水比賽打到啲項目散晒，就係唔想畀中國一個國家攞晒啲金牌，估唔到「夢之隊」真係喺女子一米板、男女子混雙同埋女子10米台出事。跳水項目玩埋禮拜六同禮拜日就完，游水項目會喺禮拜日開波，外間估計孫楊可以幫中國擸走男子200米、400米、800米同埋1,500米自由泳四面金牌㖭。