中午飯局，好不熱鬧，成張大圓枱坐滿人，近期少見也。追數K一坐低就交張支票俾W先生，似乎有私人交易，八卦啲問吓，原來後面有故事。成十年前咯，W先生嘅老友M上門求助，話要借錢匯去美國俾乖女交學費，W先生與老友M素來冇乜兩句，於是叫老友M寫下借據，話要兩年內清還本金十萬港元，利息免計。老友M千萬多謝拿住張十萬港元支票含淚而去，令W先生好感動。點知以後就冇見過面，好似失咗蹤咁，自然亦未償還個斗零。W先生大嘆倒霉，但仍然將張借據鎖在夾萬。
哈，呢個世界有一樣嘢叫做Facebook，某日突有一位平時好少見嘅同學打電話俾W先生：「喂喂，唔見近十年嘅老友M在fb出現，係我個friend嘅friend嘅friend見到嘅，原來阿M好似好風騷，坐郵輪呢度去嗰度去，post咗好多靚相，你要唔要睇吓？」W先生自己都冇fb戶口，就算有亦唔俾人add佢做friend，但一聽見阿M個名，就想起佢借錢不還，依家仲周圍去遊樂㖭，條氣認真唔順，於是叫平時專門替大銀行大財務公司追數嘅追數K諗吓辦法。
眨吓眼過咗幾個月，卒之有回報，此日交收張支票就係結果。追數K自己係電腦專才，以前大海茫茫，唔知邊度去搵人，依家有Facebook，不少人興奮得滯，周圍add friend，做friend，曝晒光，呢位M先生大概唔記得自己借咗人錢就去如黃鶴，仲周圍post自己個人資訊上網，追數K話多謝都嚟唔切，依家去搜尋欠債不還嘅人物，容易好多咯。
世界上有種人好奇，專門欺善怕惡，建築B以前有個車位租俾一位自稱會計師，欠租十個月共二萬蚊，返咗大陸打工，臨走仲掉低架老爺錢七在車位之上，激到建築B頭暈，又唔敢郁架錢七噃，唯有請教律師，代為辦理一切正規手續，先至將架車移走，唔見咗一筆費用，欠租又收唔番，氣上加氣。左丁山聽佢嘈得多，索性介紹追數K俾佢，唔駛一個月，追數K就同佢追晒番嚟，如果唔係有呢種人，追數行業點解會咁蓬勃吖。追數K話過，佢地啲大客最唔鍾意因收數而收到金管局電話，銀行收數，嚴禁一切粗口及恐嚇行為，某些人還用甚麼潑紅油貼街招唱衰諸如此類招式，已經out晒咯，永遠接唔到國際公司生意。