一直幫《蘋果日報》畫漫畫嘅政治漫畫家馬龍（圖），呢兩日冇喺隔牆有耳出現，要由尊子頂上，八方好奇怪馬龍有乜事？直到睇佢facebook先知，原來馬龍病倒了。
馬龍喺佢fb度話，早排做身體檢查之後，發現腎臟有粒腫瘤。呢啲嘢真係可大可小㗎嘛，好彩佢話呢粒瘤唔算大，屬於第一期，而為咗穩陣見，佢決定「引刀成一快，割之哉！」由於粒瘤好細，所以可以用微創手術，將粒瘤「圈出來」，咁大部份嘅腎臟都得以保留番，最後佢仲同提醒大家：「每年體檢很重要！」
原本馬龍話噚日出院，點知無端端發高燒，導致出院計劃泡湯，八方打過電話想問候，不過佢冇開電話，只好喺度祝願佢早日康復！