好喜歡寫文嘅新聞統籌專員馮煒光，帶起咗一股用文章挑機嘅「熱潮」，估唔到民主黨總幹事林卓廷都學到嘢，噚日寫咗篇叫《蠢人》嘅文章，向政圈蠢人挑機。阿廷喺成篇文鬧爆啲蠢人，認為蠢人講蠢嘢時以為拋多幾次書包，蠢話就能變成警世箴言，而蠢人同正常人辯論嗰陣，只要蠢人不斷重複「你是否X國人，你是否支持Y獨？」就立即進入無敵mode。
而且蠢人以為匿名做蠢嘢、講蠢話會冇人知，俾人踢爆後就匿喺「金鐘罩」，變「金鐘蠢人」就得。更甚嘅係，蠢人做完蠢事、講完蠢嘢都坐收豐厚俸祿。
八方見文入面所講嘅蠢人，乜咁似講白宮發言人？於是走去問阿廷，佢就嚴正聲明，呢篇係向政圈蠢人挑機，邊個要對號入座就自便，佢亦寫明針對「原本智力正常的蠢人」。八方再講多次，成篇文真係冇提過馮煒光㗎！