拍拖並非年輕人專利，曾經作過《停不了的愛》、《失眠》和《激光中》等經典名曲的58歲作曲家林慕德，與主演過麗的劇集《IQ成熟時》的54歲港台DJ鄧慧詩，雖然前者已當上外公，後者兒子亦已年近30，但兩個曾經婚姻失敗的人，去年因工作重遇，並一撻即着發展黃昏戀之餘，更開始了甜蜜同居生活！
現為港台主持節目及身為框格音樂事務揸弗人的鄧慧詩，前日在電話中大方承認跟林慕德拍拖兼同居，她指80年代雖認識林慕德，直至去年才因工作相約見面。
「成日都咀嘴」
鄧慧詩說：「佢作咗啲兒歌，問我想唔想啲歌手參與唱吓？大家坐低傾update吓近況，原來大家都單身，我20幾歲離婚，佢離咗婚10幾年，大家不斷都有拖拍，但冇諗住再結婚，唔係因為婚姻失敗驚咗，而係都遇唔到一個你想同佢結婚嘅。」二人發覺有不少共同話題和睇法，於是去年3月正式交往。是否有初戀感覺？她笑謂：「有呀，大家冇嗌交，因為冇嘢值得嗌，好接受對方任何嘢，分開一陣返工啫，都好想快啲放工見到，真係好鬼癡纏。」
可打算再結婚？鄧慧詩說：「又冇喎，佢個孫都歲幾，我個仔都30歲啦，大家已經好似家人咁，結唔結婚都冇乜所謂。雖然我哋50幾歲開始拍拖，但心態都好似初戀咁。成日拖住晒手，成日都咀嘴，啲朋友都話頂我哋唔順，但我哋令到同年紀朋友有番啲刺激囉，見到我哋50幾歲都可以咁活躍，都會反省，做人唔使咁拘謹。」
採訪：魯吉
