8月1日對曼聯同德國體育品牌「三間」，係一個別具意義嘅日子，事關曼聯將會約滿「一剔」，闊別23年後重投三間懷抱。紅魔鬼一直對新波衫保密工作做到好足，不過周四大軍踢完國冠盃由美國飛返曼市之後，就竟然遇上球迷着住新波衫拎簽名，搞到新衫曝晒光。
迪比土豪上身
由於曼聯同一剔嘅合約到7月31號先到期，所以紅魔到美國出戰國冠盃都係着住一剔波衫，連官方媒體亦唔可以宣傳住，所以今日曼聯新衫發佈會嘅內容都仲未公開，不過都係預期由朗尼、迪比、迪基亞等幾位孭飛球星，喺奧脫福主場搞吓大型活動。
保密工作幾好都有漏洞，美國有部份店舖偷步賣曼聯新衫，仲有唔少魔迷入手，好似周四就有兩位魔迷到曼市機場接機，着住新衫向朗尼索取簽名，搞到朗尼有啲避忌。新兵荷蘭前鋒迪比就係曼聯近期風頭躉，佢步出機場嘅行頭，仲俾英國傳媒大起底，話值大約一萬鎊（約12萬港元），但手揸嗰兩個法國名牌包包，就似乎強國味濃咗啲。當然曼聯收購行動仲未停，巴塞隆拿翼鋒柏度洛迪古斯加盟勢在必行，完成練習後揸車離開巴塞訓練基地嗰陣，有女球迷唔捨得咁攬住佢喊。而曼聯亦都準備同車路士爭奪愛華頓中堅史東斯，仲以27歲中堅莊尼伊雲斯作為籌碼。
名宿沙柏今訪港
至於香港都唔輸蝕，曾協助曼聯三奪英超冠軍嘅44歲中場名宿沙柏，今日起將一連兩日，現身三間位於中環海濱嘅運動基地；除咗為佢哋主辦嘅四人足球挑戰賽頒獎外，順道為舊東家嘅新一季波衫造勢。聽聞現場都會有唔少90年代嘅經典三間紅魔波衫，掛喺度做展覽，作為忠實魔迷嘅你，唔係唔嚟捧場呀？而足球評述員何輝都報料，話廣州就會跟貼英國時間，喺今朝早七點，三間會喺位於VT101嘅旗艦店搞大型發佈會。
