話說噚日梁粉網媒「港人講地」一連發出幾篇帖文，都係搵人鬧爆日前闖入港大校委會會議場地嘅學生，於是梁家傑一炮三響，將同一個回應貼番喺3篇「港人講地」相關嘅文章，一於同「港人講地」洗版。
傑哥嘅帖文大致係話，衝就俾人話唔文明、佔領又犯法、叫口號就唔禮貌、公投都話過激，你想啲人「逆來順受，坐以待斃乎？！」仲叫啲梁粉唔好轉移視線，將任命副校長問題轉移去學生衝擊嗰度。傑哥就同八方講，佢寫個回應覆「港人講地」，點知呢頭寫完，「港人講地」又出多幾篇文，佢先至重複貼啫。不過佢啲留言已經被「港人講地」刪晒，傑哥話冇所謂喇，大家自有判斷。