【西環】
今年49歲嘅太極樂隊鼓手朱翰博(Ricky),背妻偷嗒30歲戴夢夢,戀情被踢爆後,Ricky火速解畫,聲稱已同結婚27年嘅老婆Anne分居,忘年戀一撻即着,相隔20年嘅愛比一般情侶燒得更加熱熾,就算係夢夢媽出馬,都無辦法阻隔佢哋正在燃燒嘅愛火,真係你有你講。Ricky同夢夢繼續糖黐豆咁高調拍拖,懶理親人好言相勸,同埋外人嘅流言蜚語。
Ricky冇被邀請
本報收到讀者報料,話發現夢夢和Ricky前晚現身西環嘅華星客棧,原來前晚係風水師傅吳佩孚請客,夢夢亦係賓客之一。主人家吳佩孚一家四口,老婆同一仔一女,席上客仲有蘇永康、張立基等,而張立基食完飯仲喺微博貼相話:「多謝吳佩孚師傅請食飯……好食。」不過,席上唔見有Ricky嘅影蹤。
莊思敏喪煲煙
直到夜晚10時左右,先行步出餐廳嘅夢夢,喺門外四圍望,之後好快搵到男友Ricky架波子,夢夢第一時間跳上車,同男友傾咗幾句,然後再行返去餐廳方向,專登同企喺門口食煙嘅莊思敏寒暄咗幾句,之後就返上Ricky架車走人。不過見Ricky換走咗架波子之前嘅自訂車牌,套咗一個普通車牌。
其他賓客蘇永康同張立基大約11點離開,臨走前仲俾班餐廳職員捉住影合照。至於同一晚,莊思敏、陳庭欣同黃百鳴亦喺華星客棧開餐,其間莊思敏同男友人行咗出門口食煙,阿妹莊思明就食二手煙陪家姐,佢哋一班人都係食到11點幾離開。
採訪、攝影:吳耀輝、潘冠恩