立法會放暑假,唔少議員都趁機出埠玩。民主黨主席劉慧卿都計劃聽日(2號)出發,去菲律賓馬尼拉4日,不過佢唔係去玩,而係為香港嘅外傭爭取福利,卿姐果然將自己嫁咗畀工作。
卿姐噚日開記招宣佈,佢會聯同本港法律界同埋非政府組織嘅成員到馬尼拉,同當地官員、非政府組織成員會面,探討兩地政府可唔可以成立一個跨國工作小組,等香港同埋外傭輸出國透過多邊談判,處理本港外傭面對嘅問題,例如一啲不擇手段嘅職業介紹所向外傭放債、外傭被收取唔合理嘅培訓費、被扣起護照、同埋本港嘅法律程序煩瑣導致外傭尋求唔到公義等。卿姐做事非常有效率,下個星期三佢返港後,打算翌日就開記招交代成果,八方喺度希望卿姐工作順利。