暑假旺戲唔旺碟好似成咗慣例，呢兩個月龍叔叔入戲院多過匿喺屋企煲碟，《狂野時速7》、《復仇者聯盟2》同《加州大地震》都差唔多出藍光，暫時碟場仲係好靜，稍有睇頭嘅都係里安納遜套《一夜狂逃》。主角屬「老來紅」演員，喺《舒特拉名單》同《星戰前傳》紅過一輪之後，再出名啲嘅只得套《真的戀愛了》，沉寂幾年，居然有人膽敢搵呢位老人家拍動作片《救參96小時》（Taken），仲居然全球收得，搞到老人家不停披甲上陣，要拍夠三集、口碑同票房爛到冇得再爛先收手。里安納遜已屆63歲高齡，講明過多兩年唔再接動作電影，應該唔會有《一夜狂逃2》喇啩。
《一夜狂逃》上畫時龍叔叔冇入場睇，皆因知道古仔又係玩老人家為救仔出山拼黑道，同《救參》系列如出一轍，提唔起興趣入場，點知外國影評同口碑都唔錯，連出名奄尖駁古嘅港戲迷都讚，似乎又值得一睇喎。劇情好簡單，黑幫大佬同得力助手幾乎已退隱江湖，就係因為大家個仔有磨擦，仲要搞出人命，兩位老竇雖然係幾廿年老友，最後都係焗住反面，黑幫大佬發出江湖追殺令，主角同個仔就係咁展開咗「一夜狂逃」嘅着草生涯。
黑白兩道勁抽得 文戲好睇過槍戰
為增加動作場面，導演將紐約警察同黑幫拍到好似同一夥咁，黑白兩道通宵追殺，去到邊都係敵人，可以想像主角幾咁淒慘。最搞笑係班差佬好似食咗禁藥咁，神勇到無倫，飛車追逐中可以邊甩尾、邊開槍，仲型過《職業特工隊》嘅湯告魯斯，唔似盧寵茂咁無啦啦跌低，又或因「胸襲」而要告人咁弱雞。慶幸幾幕逃亡戲都叫拍得唔錯，槍戰駁火亦拍出緊張感，並非好似玩《GTA》咁一味亂撞亂射。電影係有啲《救參96小時》影子，而且冇乜懸疑扭橋成份，不過導演加入咗唔少新意同嘗試，尤其當以為結局時，又有另一驚喜畀到觀眾，算係幾有新鮮感。
劇情、動作場面，叫做合格交到功課，龍叔叔最欣賞係角色嘅演出。里安納遜演技冇過火，單係因後生時殺人無數而自責到老、酗酒潦倒嘅生活，已帶出一種悲涼滄桑感。而演黑幫大佬嘅愛德華艾倫，曾拍過龍叔叔最喜愛嘅狙擊手電影《敵對邊緣》（Enemy at the Gates），今次扮大佬依然有台型，電影入面佢已經半收山享仔福，偶然接濟吓好兄弟里安納遜，二人相伴到老，一言半語間都流露出一份兄弟情。豈料「出得嚟行、預咗要還」，年輕時做壞事，到老就係時候要還，兄弟始終要決裂，仲搞出唔少人命收場。龍叔叔越睇越欷歔，希望做多啲好事，到老時唔使點「還」啦。
不經不覺睇完近兩粒鐘嘅電影，冇太多教仔同講道理嘅悶場，睇得都幾愉快。影音質素方面，雖非A級大製作，不過動靜場面都拍得幾有氣氛，尤其係成套戲幾乎都喺夜晚發生，好考光暗層次感，而影碟表現算中上啦。最令龍叔叔驚喜嘅係，中間穿插好多長鏡，一shot過由大廈間穿梭、飛上橋、穿過欄杆再pan入屋，當然係電腦合成畫面啦，但又睇得幾過癮喎。
龍叔叔
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
編輯：陳國棟
美術：楊永昌