罕見白色袋鼠喺香港出世！若果最近去過海洋公園「澳洲歷奇」嘅市民，或者會見過一隻成日匿喺媽媽袋鼠Nano袋入面嘅紅頸袋鼠BB，天生粉紅色皮膚同白色短毛髮，係好罕見嘅白色袋鼠，不過其實白色袋鼠BB係患有罕見基因病白化症。
媽媽將胚胎「冬眠」
除眼睛以外，7個月大嘅白化B全身上下都白雪雪，而佢嘅出世原來都有段古。海洋公園陸生動物部執行經理蕭柏忠同八方講，紅頸袋鼠懷孕期一般係35日，但媽媽Nano係來港數個月後先生BB，所以佢同一眾專家估計，媽媽Nano可能喺澳洲已有咗，但袋鼠喺面對新環境下，將個胚胎「冬眠」，直到認為安全之後先生個BB。
雖然白化B個樣同其他袋鼠唔同，但都冇俾其他袋鼠歧視，袋鼠媽媽仲對佢不離不棄，館方為應付呢個「新房客」，亦特別增加食物同加強館內清潔，專家又話白化症係唔會影響佢嘅壽命同身體功能，可以健康成長。蕭柏忠又話，因為小袋鼠喺香港出世，已經習慣生活環境，暫時冇計劃將佢送返家鄉澳洲，意味白化B隨時會成為香港永久居民！