片名跟電影情節其實無乜關係，唔低俗、無殭屍，亦不覺有出到征，純粹因為粵語粗口版找來鄭中基及杜汶澤配音，就將《低俗喜劇》與《飛虎出征》結合不知哪來的殭屍九唔搭八地砌成戲名，但又正好貫切電影得啖笑的風格。
整套戲以偽紀錄片形式拍攝，雖然笑片的劇情不太重要，無厘頭反而更抵死，像吃薯片但求惹味唔講求飽肚啦，但編導亦無馬虎，有起承轉合有高潮，情節大概圍繞三隻跟現代生活近乎脫節的吸血鬼日常爆趣生活，一反以前吸血鬼電影把他們塑造得陰沉恐怖的傳統。三隻嘢看上去成熟穩重，原來行事小學過小學雞，如自認為疊馬、巴閉、英雄主義走去挑釁狼人，加埋超過一千歲仍喜愛夜蒲，又愛裝身，衰在fashion sense仍停留幾百年前無進步過，笑位算是浪接浪，86分鐘無悶場。
印象中近年睇過的搞笑片笑位充斥咸濕gag、爛口gag，或大玩政治不正確，這套戲掛低俗之名，反而笑位有創意，專門惡搞吸血鬼、狼人、喪屍的行事特徵，而且戲內較少食字gag或甚麼英式美式gag，笑位幾乎全球通行，老少咸宜，院內笑聲由頭帶到尾，我笑到肚都爆埋要執返啲內臟，上次有此情況已是多年前的《波叔出城》，又是一套偽紀錄片。加上結局沒有如荷李活電影般，最後硬是要塞點老套大道理，又再加分，難怪這部新西蘭低成本製作能夠刀仔鋸大樹，於全球十一個影展橫掃十多個獎項。
溫馨提示，粵語版近乎句句有粗口，被定為三級片，鄭中基及杜汶澤配音時順勢狂抽時事水，勝在夠喱民夠本土，不過始終不及英文版原汁原味，有同事連睇兩個版本，都認為英文版更好笑。最近香港發生極多令人扯火事件，個人長期被腦朋友阿燥控制，正好入戲院狂笑個零鐘暫忘煩惱兼平衡心理，出到戲院面部肌肉及腹肌增生，腦輕鬆同時做運動，啱返時間不夠用的香港人。
《低俗殭屍玩出征》 （What We Do in the Shadows）
導演、演員：Taika Waititi、Jemaine Clement
現已上映
評分：80分
記者：臧諾