喀山游泳世錦賽又有好戲睇，雄霸跳水比賽多年嘅中國「夢之隊」，又再失多一面金牌。今屆跳水賽事增設咗三個男、女子混合項目，其中周三舉行嘅全能賽決賽，英國「神童」戴利同佢嘅拍檔嘉蘭特爆冷攞冠軍，陳若琳夾謝思埸嘅中國組合只得第三。
混合全能賽要求每隊各派一位男選手同女選手，每人輪流跳三輪，三米板同10米高台至少要跳一次。身為10米台好手嘅戴利，當然係揀咗跳兩輪10米台啦；其中佢第二跳嘅倒立向後翻騰三周屈體，獲得全晚最高嘅101.50分。戴利同大佢10年嘅拍檔嘉蘭特各自跳晒三輪之後，總成績攞到434.65分，爆大冷力壓烏克蘭同中國對手，贏到金牌。中國繼何姿周二喺女子一米板大熱倒灶後，連續第二日喺世錦賽失金。
下周日10米台再爭過
成為英國史上第一個女子選手攞到世錦賽獎牌嘅嘉蘭特賽後話：「我哋贏咗金牌，真係好難以置信！我哋只係志在參與，但𠵱家可以講『我係世界冠軍』，感覺超正；不過最緊要係多謝戴利表現咁出色。」根據喺當地採訪嘅中國傳媒報道，戴利賽後行過採訪區時撞見相熟嘅中國記者，主動走埋去同對方講：「唔好咁難過，你哋都贏過咁多冠軍，今次就畀我哋贏番鋪啦。」
對於愛國粉絲嚟講，真係唔可以唔為國家隊擔心㗎，話晒戴利喺09年已經喺羅馬世錦賽成功突破中國霸權，𠵱家先喺混合賽攞頭威，嚟緊出戰強項10米台，肯定係邱波同楊健嘅最大威脅；下周日上演嘅決賽，應該會非常好睇。