最近立法會主席曾鈺成為細佬出頭，炮打特首梁振英，連田少都自嘆唔夠主席嚟，曾主席好明顯未肯收手，但火力降低咗，噚日喺報章專欄寫咗篇題為《寧猛毋寬》嘅文章，由明嘲改為暗寸CY。
佢喺文中指，政治領袖必須審時度勢，先能維持社會和諧穩定，佢用咗春秋時期鄭國傑出宰相子產點講治國之道說明。子產話德行高嘅管治者，施政可以寬鬆仁厚，人民心悅誠服；相反管治者德行唔夠，施政就寧可強硬，使人民生畏。
曾主席話呀，孔子評論管治者施政，必須寬猛須得宜，要審時度勢，「不懂攻心的管治者，往往也缺乏審勢的智慧，因而寬嚴失度；且多是失諸過猛，寧猛毋寬。」究竟邊個管治者「失諸過猛，寧猛毋寬」？曾主席似乎相信大家都懂的。