港大校務委員會於星期二下午開會，學生在外示威，竟有「愛字頭」人士到場「挑機」，結果當然是互相指罵。港大校友曾鈺成最近慨嘆「豬一般的隊友」，自然是有苦自知，這批「愛字頭」是建制派鐵血衞，向港大學院講要學術自主，便不要政府撥款，其無知之處，令人啼笑皆非，怪不得屢次不同民調都顯示，支持梁振英的市民，多數是低教育，年紀較大的一群，「愛字頭」人物便屬此類，他們到最高學府反示威，一眾秀才那裏有理說得清。港大校友馮煒光不知有無公關妙法為這批隊友洗刷一下？
「守護香港大學」聲明在報紙以廣告形式刊登後，左丁山睇清楚啲簽署人物，無律師L在內，明明上星期吃飯時，佢仲me me媽媽鬧「等埋首副」呢個拙劣藉口㗎，點解佢唔簽名支持？打電話問吓佢，律師L嘆曰：「吾兄有所不知，我地仲係當打時期，做事務律師要睇埋拍拿嘅情緒，你知啦，律師樓現時唔做內地公司生意，例如民企國企等等，靠乜搵食？我成日要上大陸，無謂啦。老婆亦係港大同學，佢本來想簽名，但兩公婆為此對談一晚之後，卒之決定一齊唔簽名，只係精神上支持。」人在江湖，身不由己，有時現實逼人來，諗清楚以後仲有十幾二十年要搵食，又要照顧夥計，就會覺得有縮一縮嘅必要。
律師L又話港大校友之中，以醫生最有資格嘈生晒，最惡，所以醫學院校友亦有獨立發動簽名。芸芸專業人士之中，工程師、律師、會計師、則師、測量師、規劃師等等等，皆有老闆（泛指俾你生意之人），要倚賴財團光顧／聘任，唯獨係醫生，搵食全憑個人醫術醫德，自己就係老闆，大富豪都唔敢得罪名醫啦，香港醫生（因供應不夠，可私人執業）發達容易，中環醫生不乏「星球人」、「月球人」，有錢就可以腰骨硬，駛乜聽西環吩咐、聽梁特指示！左丁山對律師L之言，當然贊同，但不得不向佢指出：「哎吔，話雖如此，咪又有不少醫生擁梁做梁粉，此則人各有志也！」
委任陳文敏做港大副校長之事，不知如何收科，到如今，委任佢，校務委員會係違背最高指示，不委任，又冇好藉口，實在進退兩難，大凡將簡單人事委任轉化為政治考慮，多數如此，在大學搞呢啲嘢，惹火了教授與學生，更加麻煩，始作俑者，正如曾鈺成所言，蠢人做蠢事！