今年3月24日上市的暴風科技，被稱為A股第一妖股，上市後創下連續34日升停紀錄，曾最高升到327元（人民幣．下同），比招股價升170倍。大跌市後，妖股現形，而家股價跌到130元，市值蒸發超過200億元。
暴風科技老闆馮鑫唔甘心股價插水，於是諗出奇招。公司7月16日發出通告，呼籲員工增持，員工只要喺7月17日至21日增持股份，持有半年後如有虧蝕，老闆個人補償損失，有賺就員工自己袋。工作三年以上員工，老闆仲私人贊助50%本金撈貨。
暴風科技當時股價190元左右，如果員工聽話撈貨，唔到10個交易日賬就蝕三成以上，且股價可能有排跌。公司第一季度仲蝕緊錢，如果繼續跌，到時馮老闆點樣賠畀員工？如果到時要賣股套現，恐怕又將拖累股價，名符其實係暴風一場。
黃尹華