過往都有唔少台灣男藝人做過衞生巾代言人，好似羅志祥、賀軍翔同林宥嘉；不過，唔知係咪文化唔同，自從周柏豪拍衞生巾廣告嘅宣傳相公開咗之後，外間嘅迴響都好大，甚至有網民話見到佢個樣都覺得經痛。
借鄭融過橋宣傳
不過，周柏豪就話一啲都唔覺得尷尬，仲話大家有咁嘅反應係意料中事。而佢老友鄭融就好抵死咁喺Ig放咗一張有個女仔捲曲坐喺度嘅漫畫相，相入面仲印咗「m痛令人變廢」幾個字，然後再留言寫住周柏豪三個字，之後柏豪就喺自己Ig放咗一張有好多衞生巾嘅相片，仲叫鄭融有需要就向西北方呼喚佢，即刻引咗大班fans留言話經痛，認真搞笑。
馮仁昭就覺得廣告商今次好成功，姑勿論大家接唔接受周柏豪嘅暖男形象，但宣傳效用就一定收到晒，嚟緊廣告商仲會安排周柏豪同班用家互動，只要你將自己每月經期話畀柏豪知，佢就會到時到候打電話嚟關心你，馮仁昭都真係好想知道周柏豪究竟會講啲乜？
撰文：馮仁昭