近期因為榮譽主席田少不時發表抵死妙論，人氣同黨員數目同步急升嘅自由黨，連喺蘭桂坊搞嘅定期「收𡃁」聚會，都竟然搞到登上《紐約時報》，引嚟該報以「Seeking a Middle Path in Hong Kong Politics（在香港政治尋找中間路線）」為題報道。
《紐時》喺報道中，除咗刊登咗一幅田大少型仔相，仲用「搖滾巨星」形容當晚出席「歡樂時光」的田少，指當晚唔少粉絲捉住佢要求合照，又話田少出咗名敢於批評建制派，更喺政改表決「甩轆」後，寸佢哋「不可救藥地蠢」，睇嚟田少呢次，真係幫建制派蜚聲國際。