特首梁振英同新界鄉紳一向唔多friend，花生友聽聞CY 5月都同鄉紳開過一次拖，搞到鄉紳㷫烚烚。
話說新任鄉議局主席劉業強近日接連到27鄉訪問，至今已到咗10幾個鄉委會聽取意見，而早前佢到訪新田鄉事委員會時，有鄉委會高層爆料話CY今年5月27喺禮賓府接見一行近40人嘅新界鄉議局海外顧問委員會時，有鄉紳當場質問CY，點解自己申請新界丁屋10幾年，至今仲未申請到時，CY反指近70萬嘅新界人口，只佔全香港人口一成，仲話新界有人將丁屋轉售賺錢，做法令市民反感，預告丁屋政策將無以為繼。
花生友聽聞，呢番語帶「恐嚇」嘅言論，令到唔少鄉紳瓜瓜嘈，有與會嘅鄉紳事後亦喺鄉議局內部會議，狠評CY「敵視新界人、對新界人不友善」，擔心CY遲早取消丁屋政策。有鄉紳仲話唔少人至今對CY上述言論耿耿於懷，唔排除劉業強11月完成27鄉訪問後，「晒馬」拉大隊到政府總部示威。如果呢一場大龍鳳搞得成，都算係強仔上任後首個代表作，唔知會唔會令佢嘅「未來」鄉議局立法會議席，更加穩固？
由於版面調動，花生友下周起逢二、四先同大家會面，會繼續八盡政圈花生事。
花生友