55歲的鍾楚紅（紅姑）逍遙自在，在家種花養貓，閒時旅行影相，探索世界。人人問女神何時復出，客串拍片、上上鏡頭？原來紅姑也有心動計劃，就是等待有趣的旅遊節目走地球。帶領保育使命去南北極，天涯自由行，或者隨走隨煮，創作美食。「呢個世界真係好amazing，有太多嘢發掘。我一出門就希望下世投胎做男人！」
撰文：林妙萍
攝影：周樂恒
造型：林嘉慈
髮型：Sev Tsang@Hair Culture
化妝：Ricky Lau @ ZING the makeup school
鍾楚紅去年拍了慈善相集《To Hong Kong with Love》，記錄香港最美麗的風景人事。現在正忙為這個計劃做收結，四處出動拍攝，捕捉香港本土花朵的美。「當作一個closing咁，搞一個小型相展，再將之前賣畫嘅錢，一次過捐畀慈善團體，件事好似完整啲。」
肥仔老貓好溫暖
影風景、影花也是靜態，動物出名難影，紅姑家中的肥貓FatBoy又如何？「佢好易影，因為佢好老㗎喇，唔係點郁。以前捉佢唔到，周圍跳、周圍飛，𠵱家好慢，有佢陪住我，我覺得好溫暖！有時我坐喺書枱、坐喺梳化，佢會好靜好靜咁走埋嚟，然後用pat pat黐住你坐，好嗲，好似一個暖水袋咁，咁我就覺得：幾好喎，佢安安靜靜咁陪住我。」和紅姑傾偈，會發現她好像小女孩一樣，笑聲又大又爽朗，充滿正能量，「哎吔，其實我唔係成日笑，我見到啲我識嘅人，我鍾意嘅人，我先會笑！不過，我都係一個容易睇嘅人，乜事上晒面，好開心又睇到晒，唔開心或者好sad，又好容易睇到晒。」大情大性，可愛率真。
復出最好為環保
神枱級的林青霞突然復出，驚人地接拍內地真人騷。紅姑即時成為粉絲下一個瘋狂召喚的女神，「我冇諗過真人騷、舞台劇，係呢，都唔知點解，其實我唔係唔鍾意拍戲，但就係冇去諗拍戲囉。」原來也有方法可以令她考慮復出，就是旅遊節目！「去南極、北極、上天下海我都肯㗎，北極應該辛苦啲。我諗要係咁，睇吓節目嘅動機係乜，如果係可以send out message，同保護環境、保育，會優先考慮，否則，我鍾意去邊就去邊，一拎起個旅行篋就行得。」
2002年已經做環保大使，家中的巨型白色加多利蘭也種足十年，講旅遊、講大自然，停不了口。去西班牙、去非洲大草原，在西藏高原五千海拔爬山，偉大無垠的天與地，「日頭好攰，夜晚又瞓唔到，有culture shock ，興奮過度瞓唔着。最後嗰三日，先去睇天葬，我哋一行上山，啲鷹飛晒出嚟，在上空不停轉，好震撼、好震驚！」大自然與食物也是令她心動的議題，「不同泥土種出嚟嘅番茄、薯仔都唔同味㗎。如果有個節目，係可以去到邊、煮到邊，咁又幾challenging，我會覺得好玩，又可以試喎。」
謝絕自拍執相王
55歲的紅姑，早前在微博上載一張素顏甜笑的自拍相，網民激讚女神。不過，原來她甚少玩自拍，連旅行留影也不多，「鍾意影人多過俾人影，除非有啲地方，我覺得一定要記錄落嚟，同埋，我好想記得呢個地方、呢個場景，咁我就會影一次。」不玩自拍，也不玩app ，美圖秀秀、B612全部没興趣，「我好慢，唔會執相，咁多app，我又唔知邊個打邊個，又唔識搞，又冇心機學。」發哥是香港出名的親民自拍王，更爆笑指粉絲見到他會驚喜手震，所以向來主動出手揸機。紅姑原來和CHANEL主帥Karl Lagerfeld一樣，不喜歡自拍之餘，也會間中狠心對粉絲say no，「咁我有時冇心理準備呀，或者我食緊飯，個樣梗係冇咁靚㗎啦，咁最好就下次先啦。」
心靈讀物Q&A
Q：記者 A：鍾楚紅
Q：最愛作家？
A：好多！有一位女作家叫楊絳，係錢鍾書嘅太太。我覺得佢嘅書好有大智慧，佢有本《走到人生邊上》，係將佢活咗咁耐、對人生事物嘅睇法，用好尖銳，但又好平和嘅方式去分享，一個個故事咁講出嚟，好有趣，又好有啟發性。
Q：近日睇緊邊本書？
A：一本係張愛玲《少帥》，另一本係村上春樹嘅短篇。
Q：令你喊爆嘅一部電影？
A：《狼圖騰》，因為我好鍾意大自然，又好鍾意動物，咁多年我做環保工作，對蒙古呢個地方特別有感情，喺大草原，天大地大，睇到人同動物、大自然關係好密切，好感動。
更多精采時尚內容，盡在 http://add.appledaily.com