【本報訊】上月政改表決一刻，自由黨因未有隨其他建制派「等埋發叔」離開會議廳，被大讚有獨立思考，卻被指不團結。田北俊昨稱，如果團結是一吹雞便跟大隊，「咁使乜要自由黨？」
「民建聯乜都支持梁振英」
田北俊表明，絕不會聽命於民建聯指揮，強調自由黨的決定是對事不對人。
田北俊稱，建制派予人印象是支持政府，所以有人會以為，既然自由黨屬建制派，便應團結行動，但他表明反對：「團結？乜嘢叫團結呀？『團結就係人哋吹雞，你咪跟住走囉』，如果咁叫團結，有人吹雞我就跟住走，咁使乜要自由黨？建制派點解要有民建聯、工聯會、經民聯、又有新民黨，變咗一個建制黨咪算數囉。市民會唔會支持一個建制黨呢？我覺得大有問題。」
田續稱，若建制派甚麼事也要團結，等於聽命於民建聯，「咁嘅做法我哋係唔會接受，因為民建聯擺到明乜都要支持梁振英，佢哋根本就係政府嘅黨，唔係所謂建制派政黨。但我哋係對事不對人，喺大是大非中我哋係可以走嘅」。
他又指，曾與湯家驊商討加入自由黨，但對方堅持要取消功能組別，這與自由黨立場不同因此「傾唔掂」。
■記者姚國雄