阿媽教落，要貼埋錢打嘅工千祈咪制，可惜阿爺叫到，就連份糧都要拎去買公司股票，冇得say no呀！
中州證券（1375）噚日出公告，話8月份開始，公司管理層同意用每月人工買公司H股。原本買公司股票都無問題，但早排阿爺落柯打，滬綜指喺4500點以下，中資券商唔准沽貨，管理層買咗公司股票都肯定冇得沽喇，咁邊樹有錢開飯呢？
今次其實係中州員工月內第二次接貨，7月8日港股股災當日，公司出通告話，員工覺得公司股價「具有吸引力」，盈利又好，自願籌集6,000萬港元接貨。中州嘅員工認真唔話得，真金白銀拎錢出嚟支持公司，點止效犬馬之勞咁簡單。
除咗中州，華泰證券（6886）員工本月亦斥資2億元掃華泰H股，交行（3328）、中信（6030）、廣發（1776）等都動員高層買貨。