中航工業董事長林左鳴呢期紅爆內地，佢近日三次喺媒體公開疾呼，話有境外敵對勢力沽空A股，意圖搞顏色革命顛覆中共。證據就係，A股大跌係由6月18日香港政改被否決當日開始，證明空軍有政治意圖。
不過，世事如棋，中航工業旗下兩隻A股，中航資本及中航黑豹前晚發出公告，表示中證監已發出通知，正對公司違規減持立案調查！林左鳴之前指摘敵對勢力做空之餘，仲話要打響A股保衞戰，大肆增持。𠵱家被中證監揭穿，不但係賊喊捉賊，佢啲出位言論可能只是為咗掩飾派貨。
所謂違規減持，一種係大股東減持沒有披露；一種係違反中證監禁沽令，偷步沽貨。情況之惡劣，肯定嚴重過所謂的境外勢力做空。人哋沽貨，就話係敵對勢力，身為國家隊自己走去掟貨，豈不是更加罪大惡極？
黃尹華