港大校務委員會前晚開會傾陳文敏嘅副校長任命，校委會成員、有鐵醫之稱嘅盧寵茂「忽然一跤」成為焦點，佢瞓低抱膝嘅影像，為網民帶嚟唔少惡搞靈感，唔少人仲話佢有插水之嫌，瘋狂改圖「贈興」；但有識得鐵醫嘅中環人則為佢呼寃，反問鐵醫點解唔可以被撞跌？
鐵醫「忽然一跤」唔使半粒鐘，網民已經立即「開工」，特別係班高登仔，改圖手腳之快，八方不得不講句「欽敬」。有人將鐵醫跌低張相key落運動員跳水相，笑佢插水；又有人將佢變成韻律泳嘅運動員。鐵醫亦喺球場上鏟人、以及喺街霸中出招。最近擺出sexy甫士嘅欣宜，同鐵醫好合拍；連卡通場面，都有鐵醫嘅蹤影，總之鐵醫無處不在，一夜間成為網上紅人！
新聞小花轟插水論低能
其實咁多改圖，都係質疑鐵醫插水，特別係好多人睇完佢跌低條片，都覺得有乜理由鐵醫喺背後會俾人踢跌？連影帝黃秋生都喺fb話，「三個人圍到咁埋，點踢？以武術嚟講，除非識拐子腳……點樣可以小小踢咗一腳可以好痛？如果咁都會痛到瞓低，照理應該行唔到。」
但鐵醫都有人聲援，某收費電視台新聞小花喺fb話：「盧醫生暈低，有班人不斷質疑佢扮暈……低能少一陣幫幫香港手唔該。」亦有網民話堂堂名醫，點會插水？有識得鐵醫嘅中環人則指，係人都知鐵醫菠蘿蓋做過手術，始終唔係後生，「咁佢真係俾人喺後面踢到隻腳，一痛之下跌低，有乜咁出奇！」據知唔少認識鐵醫嘅人都關心佢嘅情況，知道佢暫時冇乜大礙，但仲要做檢查，各人都希望佢冇事，可以盡快出院。
識睇睇留言
Iep Chu：cut！！！演得無夠真。無夠投入。無真實感！面無表情！無人會覺得係被人踢！
Kao：又一政壇影帝
名 莫：跌低前毫無異樣，面部全無痛苦表情，演技咁差，叫人點信你？
Christine Lo：盧醫生在醫學上有很大貢獻，點解你地咁無良這樣對待盧醫生，你哋仲係人嗎？？
Bonnie Lam：雖然當時的情景很容易令人懷疑盧醫生受傷的真實性，但當我們聽到他自己在電話訪問時，不是仍看見他在維護港大學生嗎？！
強 陳：可以同白宮發言人賤人馮生結拜，兩個都咁識插水
Hk Lam：港大足球老將，插水一流。
Kevin Ip：呢次真係：「天才與白癡，阿茂至知」！
資料來源：互聯網
李八方
mailto:[email protected]