講開阿爺救市，《華爾街日報》噚日搵出救市失敗嘅原因，原來就係冇咗美國聯儲局前主席格林斯潘。冷靜啲，佢唔係建議阿爺要搵外國勢力幫手，而係話內地欠缺一個有名望又可靠嘅財金官員啫。
人行前官員、現為君投集團投資總監嘅彭俊明認為，中國冇好似格林斯潘或者歐洲央行行長德拉吉咁嘅人物，中國財金官員都係由共產黨高幹委任，人行與中證監都係隸屬國務院，唔係咁獨立。
好似近期A股急跌，都係因為市場出現恐慌性拋售，但竟然冇啲重量級人士出嚟安撫投資者。有消息話，其實人行行長周小川都唔認同阿爺嘅「暴力救市」，但礙於係老闆意思，惟有照做。
相反，美國聯儲局、歐洲央行同埋英倫銀行等嘅言論就有份量得多。2009年金融海嘯，時任儲局主席伯南克向投資者確保將維持低息政策直至經濟站穩腳，支持美股進入為期6年嘅牛市；2012年歐債危機，德拉吉講句，「歐央行不惜一切維持歐元區完整」，就撐住歐股。
所以呢，救市唔使咁暴力嘅！