鍾愛磚頭嘅玄學家麥玲玲兩年幾前,以1,580萬元買入有「醫生大廈」之稱嘅佐敦嘉賓大廈一個1,600呎單位收租,啱啱租約完咗,一心諗住做良心業主,比市價平一成留住租客,點知租客唔想租晒啲樓面,話淨租一半。原本佢唔知點算,見近年劏舖乍現,靈機一觸,學人入則劏開兩個單位,分別900呎及700呎。
玲玲話,900呎嗰邊畀現租客續租,700呎嗰邊原本想租畀醫生,點知啲醫生寧買不租,最終以約1,000萬元賣咗。
家陣佢索性將900呎嗰邊連租約賣埋出去,一放盤,已經有好多醫生洽購,意向呎價1.6萬元,估計賣1,400萬元。前後加埋隨時套現2,400萬元,料賬面賺800萬元。玲玲已經四出睇貨,好想換馬買件中環商廈咁話喎!