大埔劍橋護老院喺公眾地方將長者剝光豬等沖涼事件，都發生咗一段時間，八方聽聞，警察調查經已完成，交咗個file畀律政司，睇吓會唔會告人。劍橋喺地下同一樓持有另一個牌嘅安老院，牌照8月底就期滿，上次因為4層安老院有兩個牌，社署釘牌「釘一半」成為笑話，8月底是否續牌，將會成為焦點。而喺呢個時候，社會福利署大埔及北區福利專員鄧菲烈，近日正式公佈已辭職，有公務員唔做，盛傳佢係因為劍橋事件而辭職。不過，八方就聽到另一個版本，話原來佢喺爆出劍橋事件前，經已遞信想提早退休，同埋喺幾年前，社署諗住補送佢海外進修，但要承諾幾年內唔可以離開政府，佢都拒絕咗，證明佢一早有心跳船。