今夏馬體會又有唔少球員變動，但小弟完全冇擔心，因為佢哋買返嚟嘅新兵都相當有質素，同埋有一班潛質優厚嘅小將。
先講防線，馬體會放走祖奧米蘭達都令人幾意外，話晒佢同高甸夾咗咁耐。不過米蘭達已經30歲，如果要套現，今夏係最後機會，同埋馬體會唔需要擔心接班問題，因為20歲嘅荷西基文尼斯夠晒料！近兩季如果高甸或米蘭達受傷，都係由基文尼斯頂上，佢舊年仲有入選國家隊踢世盃。雖然馬體會買咗史提芬沙域，但小弟更期待高甸拍基文尼斯呢對烏拉圭鐵衞組合。
中場方面，阿達杜倫離隊係可惜，但馬體會班年輕小將都有力上位，例如上季外借嘅奧利華托利斯，佢得20歲，上季已經係波圖嘅主力。同時，馬體會亦喺摩納哥買咗21歲嘅恩歷克卡拉斯高，佢上季喺法甲交出10次助攻，係聯賽助攻榜第三位。
前鋒方面，文迪蘇傑嘅風格唔多夾隊波，送佢走係雙贏，而且馬體會買咗兩個前鋒，一個係正值當打嘅積臣馬天尼斯（圖），另一個係21歲嘅韋圖。相信大家都熟馬天尼斯，呢位前波圖球員，年年都傳去阿仙奴，最後嚟咗馬體會。韋圖上季踢維拉利爾，聯賽入咗12球，係球隊嘅首席射手，被視為阿根廷新一代前鋒希望。加上馬體會一直奉行量入為出，扣除賣人所得，佢哋今夏嘅轉會開支只係千幾萬鎊。
文：咖喱