陳文敏能否、應否出任香港大學副校長（學術人事及資源），本是香港大學之事，香港大學校務委員會（Council）有全權決定。奇怪嘅係，港大校務委員會不知有何苦衷，猛係咁拖，遲遲未能下決定，又話要「等埋首副」，即等到聘請咗首席副校長（Provost）之後先至決定，理由係首副對副校長是誰，應該有say。之不過，幾時先至請到首副就未見交代，如果遲遲無期嘅話，等埋發叔已經甩轆，等埋首副嘅話，港大校務之學術人事及資源如此重要嘅事務，咪做死其他高層？
所謂等埋首副，其實係政治動作，睇港大法律學院校友劉進圖嘅明報文章就可知一二，劉進圖係前明報總編輯，分析事情素來下筆嚴謹，兼且係陳文敏教授嘅好友，佢嘅消息來源應該好準確，左丁山係局外人，唔信佢信邊個？但梁智鴻堅決否認，話有人作文咁作噃，兩者咪是但一個講大話？港大人唔會咁差呀嗎？
身為港大校友，醫生C老馬有火，在陸羽飲茶見到佢，佢與醫生同學嘈得緊要，講落先至知，佢早已參加聯署一份叫做「守護香港大學」嘅聲明，內容係捍衛院校自主，維護學術自由，當日仲未見報。佢打開手機俾左丁山睇吓聯署名單，第二位就係1958年畢業嘅張鄭寶蓮女士，即已故馬會主席張奧偉爵士之夫人，跟住年份一路落，有林鉅成、黃震遐、詹德隆、吳靄儀、王永平、宋恩榮、陳景生、程翔、何俊仁、余若薇、舒琪、范卓雲、張韻琪……一直去到2015年畢業生，可謂老中青三結合，三代港大人一齊出聲：校務委員會主席梁智鴻醫生屬阿爺一代（今年76歲），唔可以坐視不理啩。
醫生C在中環掛牌差不多三十年，早已印印腳，星期六日放假唔睇症，可與世無爭，但佢話百年港大招牌，豈可禮崩樂壞，任由政治因素蠶食，讓政治干涉最高學府，故此即管平時埋首書本與音樂之中，今次都要企埋出來發聲。同佢食完甜品，以為可以鬆人，點知俾醫生C捉住，分析其他七間大學情況，左丁山於是臨時爆肚：「佔中令梁先生及西環好唔爽，必以為搞大學生工作、搞青少年工作，要搞掂啲校董會主席先，再由主席去整校長。科大張建東早逝，梁特立即空降廖長城入主科大做主席，梁智鴻年尾滿任，就派定李國章做港大校務委員，中大鄭海泉又將滿任，突然間委任咗城大副校監梁乃鵬入中大校董會，城大已是梁特勢力範圍，餘不足慮矣！」