網民興高采烈惡搞盧寵茂跌倒，花生指數爆燈，連幸福醫藥都忍唔住喺facebook改圖抽水，勢估唔到抽水變咗抽火水。
幸福醫藥噚日中午上載一張以盧寵茂跌倒為背景嘅相，以「特強幸福止痛素」遮住佢個樣，圖底加咗兩句周柏豪《傻小子》歌詞：「要你看穿這心意 卻跌一跤很諷刺」，留言話不妨送對方止痛藥，不論「真痛定假痛都Work㗎！」明顯藉抽水賣廣告。
點知張圖登咗唔夠一粒鐘就被刪，「幸福醫藥」仲發聲明，話「引起部份讀者不安，感到極度遺憾。本公司並沒有對任何人有不尊重之意思，為顧及一眾支持本公司的顧客感受，故已將該帖子刪除。」唔少網民懷疑幸福受壓，而佢哋之前抽劉江華水無事，唔通劉華好like呢啲另類「鼓勵」？