世界游泳錦標賽喺俄羅斯喀山進行得如火如荼，其中跳水今屆破天荒進行13個項目，各界關注中國「夢之隊」可唔可以橫掃13金。佢哋開頭係威係勢稱霸五個項目；不過，呢個壟斷13金嘅美夢，到咗周二終於被粉碎。
意大利老將報上屆之仇
喺當地時間周二晏晝上演嘅女子一米板決賽，何姿同施廷懋嘅「雙保險」意外失金，由意大利嘅30歲老將卡樂桃爆冷稱后。卡樂桃今屆以個人一米、三米板同雙人三米板三個項目同世錦賽觀眾告別：「今次係我最後一次玩世錦賽，所以想好好享受，再爭里約奧運資格；完咗之後我就會退役。」其實佢上屆好大機會攞金牌，可惜臨尾失準，以0.1分之微輸畀何姿；經一事長一智，卡樂桃今次冇再失手，五跳總共跳出310.85分，力壓得309.20分嘅施廷懋同300.30分嘅何姿，首嘗世界冠軍滋味。衞冕失敗嘅何姿就話自己盡咗力，所以唔覺得有遺憾喎。
女子一米板意外失利，稍後喺男子雙人三米板出場嘅秦凱同曹緣唔敢鬆懈，最後一跳憑住難度系數高達3.8嘅向前翻騰四周半抱膝，總成績有驚無險以12.27分之差擊敗東道主俄羅斯組合奪金，為「夢之隊」保住少少面子。
港隊姊妹淘出發搶入奧運
跳水同韻律泳等項目已經玩咗幾日，重頭戲游水就會喺下周日展開，各國代表隊呢幾日陸續到埗，為比賽做好準備。中國隊領軍人物孫楊今屆將會出戰四個個人單項，其中首次挑戰200米自由泳就要惡鬥美國嘅洛捷迪同澳洲「伽利略」麥伊禾等好手，預期會係一場精采大戰。
至於香港五名女飛魚包括歐鎧淳（Stephanie）、何詩蓓、施幸余、劉彥恩同江旻懿，噚朝亦隨隊出發到喀山。主項係100米背泳嘅Stephanie話，好期待同一班姊妹力爭接力賽殺入頭12位，攞到里約奧運入場券。港隊七位代表都係仁川亞運接力賽銅牌得主，另外兩將謝旻樹同鄭莉梅就會喺美國飛去喀山會合。Stephanie又話，佢哋嘅目標係下周日率先進行嘅4x100米自由泳初賽，跟住仲有4x200米自由泳同4x100米混合泳，一定搏到盡。
