保耶球員時代打學生、打隊友，除咗好事乜都做齊，所謂惡有惡報，外界都估佢掛靴之後會好唔掂，唔係酗酒搞到周身病，就係爛賭搞到周身債。但係呢位38歲前列斯聯中場生活得不知幾咁好，喺法國開個「阿保的魚場」享受人生，話要挑戰自己參加頂級職業釣魚比賽。
打隊友打學生險坐監
如果英超選十大惡人，先後踢過列斯聯、韋斯咸同紐卡素等球會嘅保耶唔排第一都排第二，事關佢紀律差之餘仲要脾氣唔好，試過喺比賽時同紐卡素隊友戴亞開拖；而最轟動嗰單就係2000年同朋友及列斯聯隊友，包括家陣踢緊英冠米杜士堡嘅活基治，喺夜店門口圍毆一個亞裔學生，但佢夠運，居然打得甩唔使坐監。
2012年夏天佢離開葉士域治後決定掛靴，由於保耶個底太花，所以唔少人會估佢會好潦倒。點知佢成功洗底，仲去咗法國搞魚場生意㖭！保耶重話：「基於我球員時代嘅比賽風格，我完全理解外界會點睇我，但我唔係好似佢哋咁諗。」
至於點解會搞魚場，保耶就話：「喺我仲踢緊波嘅時候，每年六月就會同班朋友去法國釣魚。嗰度有個地方叫Orconte我超鍾意，舊年11月我打電話畀個魚場主人，佢話因健康問題想搵人頂手，結果我就買咗。」嗰個魚場本來叫「La Fritterie」，但保耶改咗做「Etang de Bows」，法文就係「阿保的魚場」（圖）。
「你可能好鍾意或者好憎釣魚，但我就超鍾意囉。釣魚係我嘅避難所，佢令我可以忘記唔開心嘅嘢，唔再發噩夢。」每逢保耶返英國嘅時候，都會約埋前韋斯咸隊友麥克盧保同埋森莫亞，去搵英格蘭同阿仙奴名宿施文一齊釣魚；佢最高紀錄試過釣到條70磅重嘅鰱魚。佢好自信咁話：「我好有釣魚天份，細細個就去河道捉水曱甴；我深信，自己有能力向呢方面發展，成為職業釣魚選手。」
