隨住永倫前晚喺灣仔新伊館以82:78擊敗南華，蟬聯甲一總冠軍後，球季亦正式收「咧」。對於球迷鬧爆買唔到決賽波飛嘅問題，籃總主席陳瑞添承諾，來季一定有所改善喎！
甲一季後賽門票安排喺城市售票網出售，每人每次可以買40張飛，添哥話明白電腦購票為球迷帶來問題，會諗方法改善︰「我哋會同票房深入研究一個公平嘅賣飛方法，或者會減低每人嘅買飛數量，總之一定會改。」至於有指福建領隊陳少煌來季「唔玩」，陣中主力鄭錦興同劉子禮等，又盛傳俾銳意打造為全職籃球隊嘅東方挖角，面臨散班，添哥就叫球迷放心：「福建係老球會，下季一定仲喺甲一，希望保留到個別主力，再加啲新球員組半青春班。」
李琪認有意全職打波
不過，東方挖角事在必行，永倫「浪花兄弟」李琪及陳兆榮，如無意外都係呢支「升班馬」嘅目標。李琪冇透露係咪轉會，但都坦承有意全職打波：「想知道自己可以去到咩水平。」