【本報訊】「以前呢度係荒野山地，嗰時我喺寶蓮寺住，住持希望有個後生過嚟幫手，點諗到一幫就幫咗19年？」俗姓龍的智定，出身富裕家庭，父母病逝，自此潛心佛學長住寶蓮寺修行，其後剃度出家，接手定慧寺時才26歲。惟與世無爭的修道生活並不長久，自90年代馬窩村開始發展，鄰近豪宅相繼落成，地價急升，反成破落寺廟的催命符。
叮噹配音員林保全是徒弟
「爸爸係共產黨員，無神論者；媽媽就係虔誠基督徒，家族中無人信佛，由細到大，只有我特別鍾意聽佛祖故事」。苦行僧、遠苦得樂，小小年紀已與別不同，多愁善感的性格，令她與同齡朋友格格不入。二十出頭，父母在毫無先兆下相繼離世，天地悠悠，但覺只剩孤身一人，適時遇上寶蓮寺住持初慧和尚，在寂靜山林鑽研佛經，她看到繁華如香港，原來還有另一片天。
「就如當年嚟定慧寺，都係因緣」。未夠五十已桃李滿門，聲演叮噹的林保全是她的徒弟，天未亮已起床上早課讀經打坐，清潔打掃一腳踢，每日如是。小小佛寺，沒有電腦，也不知上網為何物，一心追尋她心中的平淡生活，那想到物轉星移，隔着條小馬路的世界，早已變天，「外邊全部變晒豪宅，唔同晒」。連自來水都沒有的小小古剎早被遺忘，無復當年。
■記者呂麗嬋