西甲可能係歐洲最悶嘅聯賽，未開「咧」都已經估到冠軍唔係巴塞就係皇馬，神射手唔係美斯就係C朗；不過西甲都唔係冇黑馬，華倫西亞（圖）有權做西甲第三勢力。
有咁上下年資嘅球迷，一定對華倫唔陌生，曾連續兩屆打入歐聯決賽，不過輸俾皇馬同拜仁；喺賓尼迪斯領導下，仲贏過兩屆西甲冠軍，當年名將好似簡尼沙利斯、安古路、盧比斯，仲高價賣過文迪達畀拉素。但華倫同皇蘇、馬略卡呢啲地方球隊相似，華倫玩過吓歐洲賽，想大搞結果搞到財困爭啲破產。
原本新加坡富商林榮福入主華倫西亞，小弟都唔太睇好，一來林生炒股票致富，予人急功近利之感；二來華人DNA，畀得錢就想咩都管，好彩林生兩樣都冇做，等球隊慢慢變強。上季西甲華倫最後排第四，終於拎番歐聯參賽權，今夏亦大灑金錢，買斷尼格度，又購入辛迪文拿、安祖艾美達等球員，單計支出已經係西甲第二高，僅次馬體會，高過巴塞同皇馬，最緊要係留住中堅奧達文迪。
蝙蝠兵團要挑戰巴皇兩軍就真係好難，但面對馬體會變天、西維爾拆骨，有望更上一層樓去到第三位，西甲都需要更多新話題先好睇。
文：牽牛