左報《文匯報》噚日刊登咗一則更正及道歉啟事（圖），話本月10日一篇題為〈啟晴「含鉛」知情不報 民協區議員罔顧居民健康〉文章，「編輯製作標題時，對內文內容掌握和理解出現錯誤」，就此撤回上述標題，並不點名向受影響人士致歉。
原來呢篇文章質疑民協區議員楊振宇今年1月已經驗過啟晴邨住戶啲水龍頭，發現有問題卻唔出聲，民協嬲到爆炸，事關楊振宇驗過水龍頭係冇錯，但當時只係驗到有不符標準嘅材料而驗唔到含鉛。馮檢基同八方講，建制派其後仲喺民協服務嘅地區派發呢篇報道，嚴重傷害民協聲譽，民協上周已向《文匯報》發出律師信，仲研究緊從法律途徑追究派單張嘅政黨。