林峯堂妹林夏薇最近嫁畀金融才俊Jason Mok（莫贊生），有傳「富豪飯堂」福臨門佢老公都有份，之但係，福臨門兩位老闆「五哥」徐沛鈞與「七哥」徐維均早幾年先至鬧分家產，2013年五哥畀錢七哥，先至執掌港九福臨門，七哥就另起爐灶，福臨門幾時又多咗姓莫嘅老闆呢？
翻查資料，莫贊生舊年開始成為華人飲食（8272）執行董事，福臨門一路想借呢隻殼上市，由2013年開始搞，至今兩年幾都未完成單刁，仲同港交所（388）嘅上市科切磋緊，分分鐘要明年初先至大功告成。
換言之，福臨門未正式係華人飲食嘅資產，如果真係要拉上關係，華人飲食暫時只係經營福臨門姊妹店國福樓。
最重要係，華人飲食舊年透過發行可換股債券，引入招商證券、金利豐（1031）等投資者，聞說，莫贊生背後嘅老闆原本有份投資，但係後來因為投資理念不同而萌生退意，參與度並唔高，將來福臨門正式借殼上市後，呢間上市公司應該仲會嚟個董事大換班喎。