英超球隊趁暑假出訪，踢得好好睇睇，就可開拓市場，但若果行差踏錯，有嘢做得唔好，就分分鐘有反效果。曼城前幾日去咗越南訪問，但當地球迷覺得曼城班球星勁hea，完全冇心同球迷交流，所以有球迷激到火燒曼城對越南國家隊嘅波飛（圖），以示抗議。
酒店無視擁躉等候
曼城前幾日去咗越南嘅河內訪問，除咗例牌同人哋國家隊踢場友賽外，當然要出席唔少公開活動，同當地球迷見吓面、簽吓名，交流吓咁。不過，據越南傳媒報道，曼城球員態度極差，激嬲球迷。由落機講起，其實有好多球迷同記者喺機場接機，但班球員完全冇心情應酬佢哋，急急腳就上大巴走人。同時，亦有一班球迷喺酒店度等，但據一條網上短片所見，拿斯尼、史達寧、赫特等球員都幾乎無視班擁躉嘅熱情，行過就算，搞到班球迷由希望變失望，失望就變憤怒。
就算係出席公眾活動，例如係探訪兒童村，同埋到大學參觀咁，班曼城球員都係雞咁腳，停留時間少，講嘢又少。雖然有曼城死忠就喺網上幫自己偶像辯護，話球隊舟車勞頓，上場又被皇家馬德里大炒，先至心情唔好，但更多嘅球迷係非常不滿。越南球迷好自然將曼城同兩年前來訪嘅阿仙奴做對比，嗰陣阿仙奴態度一流，仲記得有位槍迷追住球隊架大巴幾條街，最後領隊雲格邀請佢上車，齊齊影相，真係贏盡越南球迷嘅心。
曼城禮拜一友賽越南國家隊，有位當地球迷原本買咗10張飛，但佢見到曼城態度咁差，就決定一把火燒晒啲飛，拍埋條片上網抗議，一日就已經超過10萬人睇咗，真係醜事傳千里！不過，公平啲講，曼城喺場波度就冇揸流攤，史達寧、高拉洛夫同大衛施華都梅開二度，加埋馬高斯盧比斯同保素兩位小將入波，以8:1大勝越南國家隊；至於場波都坐唔爆觀眾，咁燒飛嗰位會唔會因為炒燶飛，就得佢自己先知嘞。
