兩個星期前，沙田陳太接到錄音電話，指佢張信用咭有異常情況，須暫時凍結，叫佢打電話到+07559XXXX查詢。陳太好多年前畀電話祈福黨呃過一次，幾乎唔見咗幾萬銀，好彩及時收到「被報失蹤」嘅女性朋友嘅電話，先至在最後十五分鐘取回放在沙田第一城花槽底嘅現金，自此常常記住。呢次收到電話之後，醒目到立即打匯豐某分行電話，匯豐職員話完全冇件咁嘅事。於是沙田陳太叫左丁山寫出嚟，警告眾人，左丁山話呢類電話日日有，全香港都知，香港人知道晒嘅嘞，唔駛寫。
點知呢類騙徒電話，兩星期來愈發猖獗，左丁山有五六位親戚收到同類電話，訛稱機關有中聯辦、匯豐、香港郵政、順豐快遞等等。記者L前幾日做節目時呼籲聽眾唔好中計，點知做完節目返回寫字枱之後，電話響起，那邊廂傳來錄音信息：「我地係中聯辦……」記者L為之啼笑皆非，立即冚機，大聲嗌俾同事聽：「有假中聯辦電話來電，大家小心呀！」語音未落，幾位同事枱頭電話響起，一聽就係「中聯辦來電」。
沙田陳太嘅女婿醫生N亦係咁樣，佢在醫院辦公室有兩個電話，左手面響起一聽，係中聯辦，都未冚機啫，第二個電話響起，一聽就話係順豐快遞。唉，啲騙子集團呢兩個星期瘋狂出擊，以前只係利用電腦亂咁打手機電話，現在就打埋寫字樓與家庭電話，次數之多，令人難以置信。
7月20日大公報頭版大字標題：「騙徒冒中聯辦，半月呃六百萬」，副題係：「至少五人上當，一女失200萬」，嘩，半個月呃六百萬，利潤深厚噃，唔怪得騙徒集團狂打電話，中聯辦報警求助亦冇符。點樣騙財呀，一名45歲婦人報案稱自7月中旬開始收到多次一名自稱「中聯辦職員」電話，指該名姓楊婦人涉嫌在內地犯了刑事罪名，要楊女匯款130萬港元到一個內地戶口以配合調查，匯咗之後，騙徒又來電要求多匯82萬元人民幣，楊女問究竟查案有何進展，騙徒大概已經收夠籌，大膽直情叫楊女到干諾道西中聯辦查詢！之後當然係走去警署報案啦。點解講吓中聯辦就可以呃錢？如果騙徒講係ICAC，或者係曾偉雄伙記，香港人邊會匯錢，一定係第一時間報警啦！但聽到係中聯辦，就竟然心中害怕，真係去匯錢，可見中聯辦之形象有問題，反映中國官場貪污嚴重，香港有人相信，中聯辦會收錢而且有權勢！呢個形象十分負面，中聯辦要主動配合內地公安去查案拉人先至得。