有時真係不得不佩服自由黨榮譽主席田北俊㗎，或者佢太過smart嘞，成日都俾某啲蠢人針對，好在田少永遠三扒兩撥就將啲蠢人蠢事打發走，唔會受累，有時仲識抽番人水。
啱啱過咗嘅周日，田少直情落埋水去抽人水，認真親力親為。佢同成班自由黨兄弟，去咗西貢海中心執垃圾。堂堂田少去執垃圾？大家冇聽錯呀，田少話佢都係響應政府呼籲啫，仲喺facebook意有所指留言：「田記海上士多。我仲要做埋清潔大隊長，監督大家執返D（啲）垃圾。Well……清潔嘅野（嘢），邊個話淨係民建聯做得，自由黨唔做得㗎?!」有網民話好擔心田少嘅吸水大法，會令成個西貢海被抽乾喎。