大台小生花旦走得嘅都走，孭到飛做女主角嘅藝人越嚟越少，就連講廣東話唔正嘅「香香公主」岑麗香亦有機會喺倉底劇《無雙譜》做女主角，話晒香香前年先攞咗個「飛躍進步女藝員」，點知拍咗兩年劇，演技都係未夠火喉。
昨日周刊報道指，香香近日同洪永城為新片《實習天使》拍沙灘鬧交戲，香香講一句「你仲係咪人嚟㗎?依家搞成咁，你仲想我哋繼續特訓?變態」嘅對白都狂NG六次，搞到連一向好脾氣嘅洪永城都話香香公主：「你咁咪唔natural囉」，彈香香演技唔夠好，周刊又指，當日香香背對白唔夠熟，等埋位前就顧住同劉佩玥玩自拍，周圍撩工作人員傾偈，洪永城先捉住喺片場夢遊嘅香香對稿，令香香冇晒癮，放飯後，洪永城同香香講嘢時，語氣都好勞氣，話香香演技太「刻意」，更問香香：「It's not a natural movement of the words!Understand what I say?」
據報道表示，洪永城唔止追到乖乖女唐詩詠，事業仲發展得唔錯，由於形象健康，加上大台一線小生唔多，好快就被力谷上一線，拍外景當日，佢都有女助手成程服侍遞水同拎嘢，貴為余詠珊愛將，果然唔同啲!