東九變天，唔少藝人鍾愛磚頭，睇中呢個政府銳意打造嘅CBD 2，繼余文樂早前以超過2,000萬元，買入億京觀塘駿業街56號中海日升中心一個1,715方呎單位自用之後，曾經同好多藝人合作，包括黃霑、陳百祥、張國榮、蘇絲黃等嘅著名製作人蕭潮順都用460萬元，買咗呢幢商廈一個447方呎自用。
聽講佢買呢個單位，係作為「有聲書」項目嘅辦公之用。所謂有聲書，咪就係會發聲嘅書，蕭潮順搵名人為書錄音，好似已錄製《三國》，邀請黃秋生聲演關羽、阿叻聲演張飛、盧海鵬聲演曹操。
佢都買得啱時候嘅，因呢幢商廈就快加價，億京發展項目籌劃經理黎裕宗透露，中海日升中心計劃8月初加價約3%，項目暫時累計售出38%，暫套現25億元，平均成交呎價要1.1萬元。