【尋找首爾的香港】開講有話，女人最緊要嫁得好，無憂無愁沒事做，正切合一班韓國人妻的生活態度。六位嫁到韓國的人妻BoBo、Miu、Jen、Molly、Blair和準人妻Hana，不時會約到弘大一間咖啡店high tea。她們坦言韓國的生活很舒適，只是悶了一點。
記者：鄒倩婷
攝影：朱家駿
緣來自有方，BoBo和Miu在網上認識到韓國老公，Jen是透過香港朋友認識另一半，Molly和Blair都在澳洲工作假期時覓得如意郎君，最奇遇的相信是準人妻Hana，去韓國追星等偶像時偶遇男朋友。
BoBo笑言在韓國的婚後生活，比在香港舒服得多，「老公都唔要求我哋返工，可以每日起身冇嘢做、自然醒、睇劇、行街、約friends等，你話係咪闊太，見仁見智啦！」她指韓國人妻主要職責都是打理家務，最重點是煮早、午、晚三餐，「夜晚老公放工就一定要返屋企，好似灰姑娘咁！」
講嘆，真的嘆到暈，不過要學做韓國媳婦都不容易，尤其面對奶奶非一般的要求。例如Blair的奶奶要她記着叔伯兄弟的生日，不管她是否懂韓語，都要求她致電對方說聲生日快樂，然後收線。Molly的奶奶亦較傳統，覺得露腿露腳趾等都是不尊重長輩，於是要求她穿長褲，「奶奶會話我點解着熱褲，我話唔係，係短褲，佢話唔得，老爺喺度要着長褲，仲要着埋襪遮住啲腳趾，不過我都唔會。」Hana亦遇到同類問題，「我男朋友嘅媽咪唔鍾意我嘅衣着，佢會買過一批新衫畀我。」不過，BoBo教路一招取長輩歡心的必殺技，「就係食多啲，奶奶最緊要我食飯，每日記得食三餐飯！」
這班人妻都是在韓國舉行婚禮，BoBo指相比香港的婚禮，韓國婚禮是一個字－－「趕」！韓國婚禮沒有接新娘、玩新郎等，通常只在下午進行，一小時內做完西式和韓式婚禮。BoBo指韓式婚禮在一間佈置傳統的房間進行，「嗰度淨係局限屋企人睇，不斷向父母、老爺奶奶等親戚跪拜，結尾時長輩會拋紅棗和粟子畀你，你同老公用布接住，就決定你有幾多個仔女，嗰啲紅棗和粟子要即晚食咗佢。」其中老公還要背起老婆，代表之後會擔起家庭重任。
雖說韓國男人是「大男人」，但新一代韓男已經學懂讓步，尤其外國人有「語言優勢」，Miu笑言，「我韓文唔係咁好，鬧交嗰陣老公反而會覺得好可愛」，Jen認同地點頭說：「就算你講粗口，佢都覺得你講得好可愛。」Miu又指當她生氣到說要走時，老公抱緊她便沒事了。Jen解釋：「老公會了解點解我哋發脾氣，一個女仔乜都冇就跟咗佢過嚟，始終有壓力，佢自然會畀多啲關心你，會讓步多啲係真嘅。」
小貼士：參加韓國婚禮一樣要預備人情，如果不吃飯，人情公價是₩30000（約$210港元），若吃飯則是₩50000（約$350港元）。BoBo指她的婚禮邀請了約二百人，連婚紗相、租衫等花費了約十萬港元，最後有賺冇蝕！
其中一位人妻阿Miu懷孕八個月，下一集《尋找首爾的香港》到仁川探訪她，了解真正的人妻生活。
《尋找首爾的香港》
第一集：人生兩遇沙士 韓牌消毒劑靠唔住
http://bit.ly/1MlzXNo
第二集：17萬開民宿 四個月回本咁筍？
http://bit.ly/1TP72CD
第三集：韓劏房月租二千 地下室有蟲敢唔敢住？
http://bit.ly/1KlYgaT
第四集：夢想實現！月入一萬儲三千？
http://bit.ly/1IpPg79
第五集：留韓打工簽證難 你自問夠唔夠班？
http://bit.ly/1IodRTo