最近到北海道旅遊，在富良野民宿認識到，原來世上有種職業是「無薪招待員」：他們來自台灣、香港、新加坡甚至澳洲，千里迢迢來到富良野的民宿打工數周至一個月，不收分文，老闆只提供食宿。雖然冇錢收，但對年輕人來說，每天工作六至八小時，每周還有一天假期，下班後便可自由去玩，確是絕佳機會享免費食宿的旅遊體驗！令我不禁悲嘆：為何咁老才知世上有此種職業？
其實世上還有一種職業，我也曾非常嚮往，就是在海外搵食的職業足球員。就像曾旅居香港的日本球員伊藤壇一樣：踢波本身已是興趣，還可一面旅居各地，感受不同文化和生活。曾在香港、澳洲及越南等10數個國家搵食的伊藤壇，原來在39歲之齡仍在繼續足球浪人之旅，現身處「快樂國度」不丹踢球，確實何其快樂！可惜，當足球員很講天份，我註定沒這福氣，只好遙遠祝福正於葡萄牙奮鬥的香港球員歐陽耀冲。
冇料當足球員，幸好我也有能力當一個體育記者，可日日夜夜「攞正牌」睇波，還有機會周遊列國採訪各地球會及球員，應該都好正吧？可惜，最近不只兩份冇乜人睇嘅報紙，連一本好多人睇嘅娛樂雜誌都相繼停刊。紙媒式微，一向「地位更低」的體育記者前景如何？不用多說了。「你」想的職業，從來不是你想咁易存在。與各體記共勉！
文：方栢翹