內地手機業確係人才輩出，2013年創立手機品牌一加（Oneplus）嘅劉作虎，年約40歲，已經擺明想挑戰小米老闆雷軍，噚日劉作虎喺北京介紹旗下新手機，就接連暗寸小米。
劉作虎先係捉住小米Note旗艦版因樂視推出手機，售價由原先公佈嘅3,299元人仔，減至2,999元人仔發售一事，唔點名話有人「手機未推出已降價」。之後佢又話Oneplus喺印度銷量高，2,000元人仔嘅產品佔總網上銷量三成，暗指小米喺印度嘅發展未夠班。
劉作虎寸得起，皆因Oneplus喺海外已有一定知名度，尤其係歐美市場，產品喺價格與質素方面都同小米有得揮。雷軍俾起後之秀寸，唔知遲啲會唔會反擊，不過最好嘅反擊，就係佢加把勁，推出熱門新機去贏取市場掌聲。