半百美魔女羅霖前幾日帶咗三個囝囝去日本大阪放假,同日就有雜誌指佢前夫劉坤銘身邊密友爆料,狂數佢曾借錢整容、識內地富二代、同前夫金錢轇轕,而佢喺日本都話會交畀律師處理,更指爆料者係度製造是非。
雖然羅霖有是非纏身,但冇損佢同三個囝囝喺日本度假心情,見佢同囝囝都喺IG擺咗唔少相,三母子笑晒,都冇受是非影響心情。原來佢哋去咗shopping,實行阿媽搵錢,阿仔使錢喇,見佢大仔Nathan同孻仔Jonathan拎住幾大袋戰利品,美魔女仲留言:Shopping day with my three sons。